තවම මම ගැන තෘප්තිමත් වෙන්න අමාරුයි…

‘පාරදිගේ’ යද්දි විවිධ හේතුන් මත පාරවල් වසා දමනවා. අපි ඒ වෙනුවට උත්සාහ කරන්නේ අපේ ගමන අවසන් කිරීමට විකල්ප මාර්ග සොයා ගමන යන්නටයි. ඉතින් අපිත් කලා පිටු අතරට කලා ක්‍ෂේත්‍රයේ ශිල්පීන්ගේ වැඩ හොයාගෙන යන අතරතුර ‘පාර වසා ඇත’ ටෙලිනාට්‍ය තුළ නතර වුණේ එහි රංගනයෙන් එක්වන ටෙනායා ස්ටෙෆනි කොතලාවලගේ (Tenaya Stephanie Kothalawala) රුව ළඟයි. ඇයගේ කලා දිවියේ සොඳුරු මතකයන් අවදි කරමින් ඇය සමග කෙටි පිළිසඳරකට සම්බන්ධ වුණා.

ටෙනායා කොහොමද මේ දිනවල කලාකටයුතු..?
මේ දවස්වල ජයප්‍රකාශ් සිවගුරුනාදන්ගේ ‘පාර වසා ඇත’ ටෙලිනාට්‍යයේ රූප ගතකිරීම් සඳහා සම්බන්ධ වෙනවා. ඒ වගේම මගේ නිරූපණ කටයුතුත් සමබරව කරගෙන යනවා.

දැන් ඔබ මෝස්තර නිරූපණ කටයුතුවලින් ඈත් වෙලාද..?
තාවකාලිකව ටික කාලයකට නිරූපණ ක්‍ෂේත්‍රයෙන් ඈත්වෙලා ඉන්නේ. ඉදිරියේදී නිරූපණ ක්‍ෂේත්‍රයේ වෙනස් නිර්මාණ කටයුතු ටිකක් අපේ එපෙක්ස් මොඩල් ඇකඩමිය එක්ක එකතුවෙලා කරන්න සූදානමින් ඉන්නවා.

ටෙනායා රඟපාන්න ඇවිත් සෑහෙන කාලයක් වෙනවා නේද?
මම මුලින්ම සිනමාවට තමයි සම්බන්ධ වුණේ. මම කුඩා අවදියේදී අධ්‍යාපන කටයුතු අවසන් වෙනකම් රඟපාන්නේ නැහැ කියලා හිතුවා. අධ්‍යාපන කටයුතුවලට අමතරව පසුකාලීනව රංගන පිළිබඳව මම ප්‍රවීණයන් යටතේ හැදෑරීමක් කළා. විවිධ නිර්මාණවල එකිනෙකට වෙනස් චරිත නිරූපණය කිරීමට මට හැකි වුණා. හැබැයි මම සම්බන්ධ වුණු බොහෝ සිනමා නිර්මාණ තවම තිරගත වුණේ නැහැ. දැන් මම කැමැති ටෙලිනාට්‍ය පැත්තෙන් ඉදිරියට යන්න. සෑහෙන කාලයක් මම මේ ක්‍ෂේත්‍රයට සම්බන්ධ වෙලා හිටියත්, මට තවම මම ගැන තෘප්තිමත් වෙන්න අමාරුයි.

ඔබ සම්බන්ධ වුණු නිර්මාණ ගැන මතක් කරමු..?
මම වහල උඩ, සකුගේ කතාව, රාජ යෝගය, අමාලියා, හේලී, කිදුරාදරි, පාර වසා ඇත, මියුසික් වීඩියෝ විස්සකට විතර සම්බන්ධ වුණා. ගින්දරි 3, අභිෂේක, ශ්‍රී වික්‍රම, නො ප්‍රොබ්ලම් ඩාලියා ගොඞ් ෆාදර් මම රඟපාපු චිත්‍රපට අතරින් කිහිපයක්.

මෙතෙක් නොලැබුණු චරිත අතරින් ඔබ වඩාත්ම කැමැති මොන වගේ චරිත සඳහාද..?
මම ගොඩාක් කැමැති දඟකාර, කටකාර ගැහැනු ළමයකුගේ චරිතයක් නිරූපණය කරන්න. ඉදිරියේදී එවැනි අවස්ථාවක් ලැබුණොත් මගේ උපරිම දායකත්වය එයට ලබාදෙනවා.

ඔබව ගොඩදෙනෙක් දැන හඳුනන්නේ ‘සමාධි’ ලෙසට..?
මෙහෙමයි… ‘සමාධි’ කියන්නෙත් ටෙනායා කියන්නෙත් මමයි. ‘සමාධි’ නමින් තමයි මාව ගොඩදෙනෙක් අඳුරන්නේ. ඉදිරියේදී කලා ක්‍ෂේත්‍රයේ ටෙනායා කියන මගේ නම තමයි භාවිත කරන්නේ. මම කැමැති හැමෝම මට ටෙනායා කියනවාට.

ඔබ කලාවට එන්නේ කලා පවුලක කෙනෙක් නිසා කියලා ඔබ පිළිගන්නවද..?
ඔව්… මම කලාවට ගොඩාක්ම කැමැත්තක් ඇති වුණේ මගේ පියාගේ නිර්මාණ. ඔහුගේ රඟපෑමේ තිබුණු තාත්වික බව. ඒ වගේම මගේ මවුපියන්, නෑදෑයින් කලාවට විවිධ දක්‍ෂතා පෙන්වපු අය නිසයි. ඉතින් මම හිතුවා එයාලාගෙන් පස්සේ එයාලාගේ නම මේ ක්‍ෂේත්‍රයෙන් ඉදිරියට ගෙනියන්න නම් මමත් මේ ක්‍ෂේත්‍රයට සම්බන්ධ වෙන්න ඕනෑ කියලා. මගේ සීයා තමයි ප්‍රවීණ ටෙලිනාට්‍ය, චිත්‍රපට අධ්‍යක්‍ෂ කුසුම් චන්ද්‍ර ගමගේ කියන්නේ.

-වසන්ත විතාරණගේ

Related posts

Leave a Comment